AQSh prezidentligiga nomzod Ukrainaning NATOga a’zo bo‘lishiga qarshi chiqdi

Respublikachilar partiyasidan AQSh prezidentligiga nomzodlardan biri Ron DeSantis Ukrainaning NATOga a’zo bo‘lishiga qarshi chiqdi va bu AQSh xavfsizligi manfaatlariga to‘g‘ri kelmaydi, degan fikrni bildirdi. «O‘ylaymanki, Ukrainaning NATOga a’zoligi bizning manfaatlarimizga to‘g‘ri kelmaydi. Bu faqat majburiyatlarimizni oshiradi, ammo agar biz yana ko‘proq majburiyatlarga ega bo‘lsak, buning evaziga qanday foyda olamiz?» — dedi u amerikalik jurnalist Glenn Bekning 23 sentabr kuni e’lon qilingan podkastida. 

DeSantis, shuningdek, agar Kiyev bu yordamdan mojaroga barham berish uchun foydalanmasa, Ukrainaga yordam bo‘yicha «ochiq chek» taqdim etishni to‘g‘ri deb hisoblamasligini yana bir bor ta’kidladi. 

Ukrainaga Amerika yordamining yangi paketi 

Ron DeSantis bilan suhbat AQSh prezidenti Jo Bayden Ukraina prezidenti Volodimir Zelenskiyni Oq uyda qabul qilganidan ikki kun o‘tib e’lon qilindi. Oq uyda Ukraina davlat rahbari AQSh kongressmenlariga Rossiya qurolli agressiyasini qaytarishda o‘z mamlakatiga harbiy yordam ko‘rsatishni davom ettirishga chaqirdi. 

Shundan so‘ng, AQSh ma’muriyati Kiyevga harbiy yordamning yangi paketini e’lon qildi va Baydenning dastlabki qarshiligiga qaramay, Kiyev uzoq vaqtdan beri Vashingtondan so‘rayotgan qurol - uzoq masofali ATACMS raketalarining «kichik partiyasi» berilishini bildirdi.

Shu bilan birga, AQShning Ukrainaga harbiy yordami keyingi paketlari AQSh Kongressi roziligini talab qiladi, chunki joriy budjet sentabr oxirida tugaydi. Vakillar palatasidagi respublikachilarning kichik, ammo nufuzli bloki Ukrainaga harbiy yordam davom etishiga qarshi bo‘lib, Markaziy va Janubiy Amerikadan ko‘plab muhojirlar oqimi fonida Qo‘shma Shtatlar o‘z chegarasini mustahkamlashga e’tibor qaratishi kerakligini ta’kidlaydi. 

Bayden Ukrainaning NATOga kirish vaqti hali kelmadi, degan fikrda 

Oq uy Ukrainaga harbiy yordamni davom ettirishga va’da berdi. Shu bilan birga, Jo Bayden hozir Ukrainaning NATOga kirishi uchun vaqt to‘g‘ri kelmaydi, degan fikrni bildirdi. «Hozirgi vaqtda, urush o‘rtasida Ukrainani NATOga qabul qilish yoki qabul qilmaslik borasida NATOda konsensus yo‘q deb o‘ylamayman», degandi Amerika prezidenti iyul oyida CNN telekanaliga bergan intervyusida. 

Florida gubernatori Ron DeSantis yil boshida Rossiyaning Ukrainadagi harbiy harakatlarini «hududiy bahs» deb atagani uchun nufuzli respublikachilarning tanqidiga uchragan edi.