Isroildagi elchixona: Majburan ushlab turilganlar orasida o‘zbekistonliklar borligi haqida ma’lumot kelib tushmagan

O‘zbekiston elchixonasi Isroil va G‘azo sektoridagi mojaro hududlarida majburan ushlab turilganlar orasida vatandoshlar borligi haqida diplomatik missiyaga ma’lumot kelib tushmaganini ma’lum qildi.

"O‘zbekistondagi ayrim OAV  Isroil-Falastin harbiy to‘qnashuvlar chog‘ida asirga olingan O‘zbekiston fuqarolari haqidagi tasdiqlanmagan ma’lumotlarni tarqatmoqda, - deyiladi mamlakatning Isroildagi elchixonasi saytida e’lon qilingan bayonotda. - Sizga shuni ma’lum qilamizki, Elchixonaga Isroil va G‘azo sektoridagi mojaro hududlarida majburan ushlab turilganlar orasida O‘zbekiston fuqarolari borligi haqida ma’lumot kelib tushmagan".

Qayd etilishicha, hozirda O‘zbekiston fuqarolarini Isroilda ro‘yxatga olish tezlashtirilgan va soddalashtirilgan tartibda amalga oshirilmoqda. Elchixona Isroilda yashayotgan O‘zbekiston fuqarolariga yana bir bor murojaat qilib, tezkor aloqa va amaliy yordam ko‘rsatish maqsadida o‘zlarining istiqomat manzillari to‘g‘risidagi ma’lumotlarni diplomatik vakolatxonaning elektron manziliga jo‘natishni so‘ragan.

Elchixonaning aloqa ma’lumotlari: 03-672-2466, 03-672-2371, 03-758-5075, 03-758-5076, 054-4851397.

Elchixona ma’lumotiga ko‘ra, Isroilda 10 mingga yaqin O‘zbekiston fuqarosi istiqomat qiladi va vaqtincha mehnat faoliyati bilan shug‘ullanadi.