Rossiyadagi migrantlardan farzandi uchun tibbiy sug‘urta sotib olish talab qilinishi mumkin

Rossiyada migrant oilalar farzandi uchun ixtiyoriy tibbiy sug‘urta (ITS) polisini majburiy sotib olishni joriy qilish imkoniyati o‘rganilmoqda. Bu haqda Rossiya prezidenti huzuridagi Bolalar huquqlari bo‘yicha vakil Mariya Lvova-Belova yozdi.

«Biz Rossiya fuqaroligi bo‘lmagan oila bolalariga tibbiy yordam ko‘rsatish masalasidan xavotirdamiz. Biz migrantning oilasi o‘z farzandi uchun ixtiyoriy tibbiy sug‘urta polisini majburiy sotib olishni joriy etish imkoniyatini o‘rganmoqdamiz», deb yozdi u ijtimoiy tarmoqda.

«Polis bolalarning sog‘liqni saqlash huquqini himoya qilishi, o‘z-o‘zini davolash bilan bog‘liq asoratlarning oldini olishi va bolalar guruhlari va migrantlarning ixcham jamoalarida infeksiyalar tarqalishining oldini olishi mumkin», deb qo‘shimcha qildi u.

Uning xabar berishicha, 2023 yilning birinchi choragida Rossiyaga 1,3 million kishi kirgan, bu o‘tgan yilning shu davriga nisbatan 1,6 baravar ko‘p.

Mutaxassislarning fikriga ko‘ra, Rossiya maktablariga borgan bolalarning taxminan 20 foizi rus tilini umuman bilmaydi yoki juda past darajada gapiradi. «Bu ularning moslashuviga jiddiy ta’sir ko‘rsatadi», deb yozadi ombudsman.