ATTO tizimidan pul mablag‘lari asossiz yechib olinayotgani haqidagi xabarlarga izoh berildi

Transport vazirligi buni pul mablag‘lari vaqtida yechib olinmagani bilan izohladi.

Foto: Kun.uz

Oktyabr oyining ikkinchi yarmidan boshlab, ATTO tizimining ba’zi validator uskunalaridagi tranzaksiyalar kechikib kelmoqda. Bu haqda Transport vazirligi xabar berdi.

Shu sababli yo‘lovchilarning ATTO transport va bank kartalari hisoblaridan avval (Beruniy hamda Buyuk ipak yo‘li metro bekatlarida) amalga oshirilgan sayohatlar uchun pul mablag‘lari yechib olinmoqda.

Xabarda validator uskunalaridagi tranzaksiyalarning kechikib kelishi sababi ma’lum qilinmagan. Agar bu nosozlik bo‘lsa, u qachon bartaraf etilishi haqida ham ma’lumot yo‘q.

Ta’kidlanishicha, ATTO mobil ilovasidagi «To‘lovlar tarixi» sahifasida yechilgan mablag‘larni tekshirish imkoniyati mavjud.

#Toshkent #jamoat transporti #ATTO