Safarbar qilinganlarning qarindoshlari rossiyaliklarga murojaat bilan chiqdi

Safarbar qilingan rossiyaliklarning qarindoshlari va do‘stlari ularni frontdan qaytarishga urinib, yordam so‘rab «Rossiyaning ko‘p millatli xalqiga» murojaat qildi. Murojaat matni 27 noyabr, dushanba kuni ertalab butun mamlakat bo‘ylab safarbar qilinganlarning yaqinlarini birlashtirgan «Put domoy» Telegram-kanalida e’lon qilingan. 

«Bu barchaga murojaat, to‘g‘rirog‘i, yordam chaqirig‘i. Bizning fojiamiz sizning ko‘z o‘ngingizda ro‘y bermoqda, bunga yolg‘iz chidab bo‘lmaydi! Biz hamma eshiklarni taqillatganmiz. Davlatimiz yordam chaqirig‘iga birinchi bo‘lib javob berganlardan yuz o‘girdi. Birinchi navbatda, safarbar etilganlarning o‘zlari va yaqinlaridan», — deyiladi murojaat boshida. Uning mualliflari «deyarli umid qolmagan» deb yozgan. 

«Hech birimizning ishonchimiz qolmagan. Ko‘pchilikning kelajagi ham yo‘q. Lekin, ma’lum bo‘lishicha, biz saylovchilar yoki fuqaro emasmiz, balki endi umuman odam emasmiz», deyiladi murojaatda.

Soxta va’dalar va sukut saqlashni sotib olishga urinishlar 

Murojaatda ularni qo‘llab-quvvatlash maqsadida bir necha viloyatlarda miting tashkil etishga urinish muvaffaqiyatsiz yakunlanganidan so‘ng safarbar etilganlarning yaqinlari aldanganini tan oladi. «Bizni aldashdi va sizni ham aldashadi. Axir, bu vaqt davomida bizga faqat soxta barqarorlik, ishonchlilik, xavfsizlik ko‘rsatildi», - deb yozadi xabar mualliflari.

Ular Rossiyada zaxiradagilar chaqirilmasligiga va’da berilgani, keyin esa «aslida va’dalar soxta bo‘lib chiqqanini» eslatdi. «Ko‘pchilik qaytib kelmaydi. Safarbarlik dahshatli xato bo‘lib chiqdi. Biz qonunga bo‘ysunuvchi tabiatimiz uchun jazolandik. Erkaklarimiz barqarorlik uchun qon bilan, biz esa sog‘lik va ko‘z yoshlar bilan tovon to‘laymiz», - deyiladi murojaatda. Mualliflar halok bo‘lganlar va yaradorlar uchun davlat tomonidan taqdim etilayotgan to‘lovlar va imtiyozlarni ularning «og‘zini yopishga» urinish deb atadi. «Odamning hayoti narxi haqida gap ketganda, men bunday jirkanch taklifni berishga jur’at etganlardan nafratlanaman», deb ta’kidlaydi ular. 

«Hech kim himoyalanmagan» 

Murojaat mualliflarining ta’kidlashicha, «kelajakda hech kim himoyalanmagan». Ular mamlakatdagi vaziyatni absurd deb atadi, shu bilan birga «intilishlarini eshitishlariga» umid bildirdi. «2024 yil oila yili deb e’lon qilindi. Xotinlar ersiz yig‘layotgani, bolalar otasiz o‘sayotgani, ko‘pchilik yetim qolganini hisobga olsak, bu tushunarsiz. Qamoqdan so‘ng yana jinoyat sodir etgan odamxo‘r-qotil esa oradan olti oy o‘tib, maxsus harbiy operatsiyada qotilliklar uchun o‘z aybini yuvib ozodlikka chiqyapti», deyiladi murojaatda.

Yakunda safarbar etilganlarning yaqinlari frontga chaqirilganlarni qaytarish va xizmat muddatini belgilash to‘g‘risidagi arizaga imzo chekishga chaqirdi. «Biz qayiqni silkitib, siyosiy vaziyatni beqarorlashtirishdan manfaatdor emasmiz. Biz - uyga yo‘ldamiz. Biz har qanday holatda ham o‘z erkaklarimizni qaytarishga qat’iy qaror qildik», deyiladi hujjatda. 

Safarbar qilinganlarni uyga qaytarishga chaqiruvchi aksiyalar

So‘nggi oylarda Rossiyada safarbar qilinganlarning oilalari Ukrainadagi urushda bir yildan ortiq vaqt o‘tkazgan erkaklarning vatanga qaytishini talab qilib, tobora ko‘proq aksiya uyushtirmoqda. Ular urushga safarbar etilganlarning maksimal muddatini bir yil bilan cheklashni, barcha yaradorlarni ortga qaytarishni va armiyaga chaqirib bo‘lmaydigan kasalliklar ro‘yxatini kengaytirishni talab qilmoqda. 

Mahalliy hokimiyatlar COVID-19 pandemiyasi sabab fuqarolarga Rossiya bo‘ylab miting o‘tkazishga ruxsat bermayapti. Kreml talablarga izoh bermadi. 7 noyabr kuni Moskvadagi piketdan so‘ng, «harbiy muxbir» Aleksandr Sladkov rahbariyatning «hozir hamma maxsus harbiy operatsiya oxirigacha kurashmoqda» degan so‘zlari haqida yozdi. Sladkovning so‘zlariga ko‘ra, «muxbirlar bilan so‘nggi uchrashuvda» safarbar etilganlarni rotatsiya qilish va frontdan qaytarish rejalari yo‘qligi haqida gapirilgan.