Putin «jonli muloqot» va katta matbuot anjumani o‘tkazadi 

Rossiya prezidenti Vladimir Putin 14 dekabr kuni jonli efirda rossiyaliklar savollariga javob beradi, shuningdek, OAV uchun katta matbuot anjumani o‘tkazadi. Bu haqda uning matbuot kotibi Dmitriy Peskov ma’lum qildi. 

«14 dekabr kuni Vladimir Putin yil yakunlarini sarhisob qiladi. Bu TV dastur ko‘rinishida bo‘ladi va jonli efirdagi muloqot bilan yakuniy matbuot anjumanining birlashgan formati shaklida o‘tkaziladi», dedi Peskov. 

Dastur «Vladimir Putin bilan yil yakunlari» deb nomlanadi va uning tahririyati Umumrossiya xalq fronti (UXF) bosh qarorgohida joylashadi. 

«Ma’lumki, «jonli muloqot» aniq vaqt bilan chegaralanmagan. Bu o‘ziga xos xususiyatga ega bo‘lgan juda uzoq va mazmunli tadbir», dedi Kreml vakili jurnalistlarning tadbir davomiyligi haqidagi savoliga javob berar ekan. 

Peskov so‘zlariga ko‘ra, rossiyaliklardan savollar 1 dekabrdan qabul qilinadi. Bu yil buni UXF xodimlari amalga oshiradi. Tadbirda rossiyalik jurnalistlar, shuningdek, «akkreditatsiyadan o‘tgan va Moskvada faoliyatini davom ettirayotgan» xorijiy nashr xodimlari ishtirok etadi», deb qo‘shimcha qildi Kreml vakili. 

2022 yilda Rossiyaning Ukrainadagi harbiy amaliyotlari fonida Putinning «jonli muloqoti» va katta matbuot anjumani o‘tkazilmadi.