Rossiyada o‘zbekistonlik bolalar «Mangu olov»ni o‘chirib qo‘ydi. Endi ularni oilasi bilan deportatsiya qilishmoqchi

Sankt-Peterburgdagi Krasnoye Selo shahrida uch nafar bola «Mangu olov»ni qor bilan o‘chirib qo‘ydi. «Fontanka» nashri xabar berishicha, endi ular va ularning oilalari Rossiyadan chiqarib yuborilishi xavfi yuzaga kelgan.

Hodisa 10 dekabr kuni kechqurun ro‘y bergan. Nashr e’lon qilgan videoyozuvda bolalardan biri «Mangu olov» ustiga hovuchlab qor tashlagani, yana ikki nafari esa uni gijgijlab turganini ko‘rish mumkin.

Politsiya bolalarning shaxsiga aniqlik kiritgan — ular 10 va 14 yoshli aka-ukalar, shuningdek yana bir 12 yoshli bola bo‘lgan. Politsiyadagilar bolalar va ularning ota-onalari «yaqin xorijiy davlatlardan birining fuqarolari» bo‘lib chiqqanini ma’lum qilgan. Baza manbasi esa bu mamlakat — O‘zbekistonligini bildirgan.

Rossiya Ichki ishlar vazirligining Sankt-Peterburg bo‘yicha bosh boshqarmasi 11 dekabr kuni bolalarning oilasi kerakli hujjatlarni rasmiylashtirmasdan Rossiya hududida bo‘lib turganini ma’lum qildi. Shu munosabat bilan politsiya ularni mamlakatdan chiqarib yuborish uchun sudga murojaat qilmoqchi.

• Rossiyaning turli shaharlarida politsiya muntazam ravishda «Mangu olov»ga nisbatan qandaydir harakatlarni sodir etgan odamlarni hibsga oladi. Odatda ularga nisbatan ma’muriy huquqbuzarliklar to‘g‘risida protokollar tuziladi, ammo jinoiy ishlar ham uchrab turadi — bunday ishlar dafn joylarini tahqirlash yoki natsizmni oqlash haqidagi moddalar bo‘yicha qo‘zg‘atiladi.