Isroil Livandagi HAMAS ofisiga zarba berdi

Zarba oqibatida HAMAS yetakchilaridan biri o‘ldirilgani aytilmoqda.

Foto: AP

Isroilning uchuvchisiz samolyoti Livan poytaxti Bayrut shahridagi HAMAS ofisiga zarba berdi. Bu haqda Livan davlat axborot agentligiga tayanib Haaretz xabar berdi.

Dastlabki ma’lumotlarga ko‘ra, HAMAS yetakchilaridan biri, tashkilot siyosiy byurosi raisi o‘rinbosari Solih al-Aruriy o‘ldirilgan.

Uning o‘limi haqidagi ma’lumotni Isroilning BMTdagi doimiy vakili Denni Denon tasdiqladi.

«Men TsAHAL, ShABAK, Mossad va xavfsizlik kuchlarini HAMAS harakati yuqori martabali rasmiysi Solih al-Aruriyning Bayrutda o‘ldirilgani bilan tabriklayman. 7 oktyabrdagi qirg‘inida ishtirok etgan har bir kishi bilishi kerakki, biz ular bilan hisob-kitob qilamiz», deb yozdi Denon ijtimoiy tarmoqda.

Livanning Al-Mayadeen telekanali ham al-Aruriy o‘limini tasdiqladi. Ma’lumotlarga ko‘ra, zarba oqibatida 6 kishi halok bo‘lgan.

#Isroil #Livan #Hamas

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.