Rossiyalik bloger Toshkent teleminorasining taqiqlangan eng yuqori qismiga chiqdi

Ijtimoiy tarmoqlarda rossiyalik bloger Toshkent teleminorasining taqiqlangan eng yuqori qismiga chiqqani aks etgan video tarqaldi. Toshkent teleminorasi ma’muriyatining Kun.uz’ga ma’lum qilishicha, bu 2022 yilda sodir bo‘lgan.

Ma’muriyatga ko‘ra, teleminoraning taqiqlangan qismiga chiqqan bloger rossiyalik bo‘lib, video uning “Gopro” kamerasida tasvirga olingan. Klimbing (tirmashib chiqish) sporti bilan shug‘ullanib, shu yo‘nalishda videolar tasvirga oladigan bloger aslida teleminoraning “Alvon” zali – restoran qismiga ovqatlanish uchun chiqqan. So‘ngra u yerdan tashqaridagi temir konstruksiyalariga osilib, hayot uchun xavfli holatda machtachilar foydalanadigan maxsus narvonlar orqali yuqoriga ko‘tarilgan.

Bloger tarqatgan videotasvirlar 2022 yilda olingan bo‘lib, uning Instagram’dagi sahifasiga 2024 yil yanvar oyida joylangan.

Qo‘shimcha qilinishicha, hozirgi kunda teleminoraning taqiqlangan qismlari zamonaviy axborot kommunikatsiya texnologiyalaridan foydalangan holda qat’iy nazoratga olingan. 

Blogerning Instagram’da yozishicha, teleminoraga kirishda qo‘riqlash xizmati xodimlari metallodetektorlar orqali barcha elektron uskunalarni olib qo‘ydik deb o‘ylagan, lekin bloger o‘zi bilan yashirincha tasvirga oluvchi boshqa texnikalarni olib kirishga muvaffaq bo‘lgan. Bloger teleminora tepasiga chiqa olmasam kerak, deb o‘ylagan, lekin kutilmaganda nazoranciz koridor orqali qo‘riqchilar ko‘zini shamg‘alat qilib, faqat texnik xodimlar uchun mo‘ljallangan joydan yuqoriga chiqishga muvaffaq bo‘lgan.

Kameralar soni ko‘pligi sababli bloger “hozir oldimga qo‘riqchilar yetib kelishsa kerak” deb o‘ylagan, ammo u bilan hech kimning ishi bo‘lmagan. Shundan so‘ng, u zinalar orqali yuqoriga ko‘tarilgan hamda yashiringan holda teleminora tepasiga chiqib, syomka qilib qaytishni uddalagan. Blogerning aytishicha, videoni e’lon qilgach, teleminora ma’muriyati videoni o‘chirishni so‘ragan.