Tadbirkorga yengilroq jazo tayinlatib berishini aytib 15 ming dollar talab qilgan shaxs ushlandi

Holat yuzasidan Jinoyat kodeksining ikkita moddasi bilan jinoyat ishi qo‘zg‘atilgan.

Foto: Bosh prokuratura huzuridagi departament

Bosh prokuratura huzuridagi departamentning xabar berishicha, departament hamda DXXning Jizzax viloyati boshqarmalari tomonidan o‘tkazilgan tezkor tadbirda firibgarlik jinoyatini sodir etgan shaxs ushlangan.

Fuqaro R.A. “T-Sh.” MChJ rahbari D.E.ga nisbatan qo‘zg‘atilgan jinoyat ishi bo‘yicha go‘yoki yuqori lavozimda ishlovchi tanishlari yordamida 15 ming dollar evaziga yengil jazo tayinlatib berishini aytib, shundan 5 ming dollar olgan vaqtida ashyoviy dalillar bilan ushlangan.

Qayd etilishicha, mazkur holat yuzasidan Jinoyat kodeksining 25, 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.