Ukraina TIV rahbari Kiyev TAURUS raketalarini olishiga ishonch bildirmoqda

Ukraina tashqi ishlar vaziri Dmitriy Kulebaning fikricha, Germaniya o‘z mamlakatini yuqori aniqlikdagi TAURUS qanotli raketalari bilan ta’minlaydi. «Yo‘q degan aniq javobni eshitmaganimiz o‘z-o‘zidan javobdir. O‘tgan ikki yil ichida hayot bizga buni o‘rgatdi», dedi u 17 fevral kuni kechqurun Myunxen xavfsizlik konferensiyasi chog‘ida. 

Kulebaning eslatishicha, shu paytgacha Ukrainaga yangi turdagi qurollarni yetkazib berish bo‘yicha har qanday munozaralar rad etish bilan boshlangan, Germaniya hukumati Leopard tanklarini Kiyevga topshirishdan oldin ham ikkilangan. Ukraina 2023 yil may oyida Germaniyadan 500 km masofaga ega TAURUS raketalarini front chizig‘idan ancha orqada joylashgan harbiy nishonlarga zarba bera olish uchun rasman so‘ragan edi. 

Oktyabr oyida Germaniya kansleri Olaf Shols Germaniya bu raketalarni Kiyevga hali yetkazib bermasligini aytgan edi. Bu Kiyevning Rossiya hududiga hujum qilish uchun TAURUS raketalaridan foydalanishi mumkinligidan qo‘rqish bilan bog‘liq. Joriy Myunxen konferensiyasida Shols TAURUS’ni Ukrainaga yetkazib berishni ma’qullash niyatidami, degan savolga javob berishdan qochdi. U faqat Germaniya Kiyevni qo‘llab-quvvatlash uchun doimo yetarli harakat qilishiga ishontirdi. 

Germaniya Ukrainaga yordamni kuchaytirmoqda 

Dmitriy Kuleba o‘z umidlarini Germaniya hozirda Ukrainani qo‘llab-quvvatlashini sezilarli darajada oshirayotgani bilan asosladi. Vazirning so‘zlariga ko‘ra, buni Ukraina prezidenti Volodimir Zelenskiyning Berlinga tashrifi yaqqol ko‘rsatdi, uning davomida ikki davlat o‘rtasida xavfsizlik sohasida hamkorlik bo‘yicha uzoq muddatli shartnoma imzolandi va Kiyevga yangi harbiy yordam paketi ajratilishi tasdiqlandi. 

Kuleba TAURUS raketalarining Ukraina uchun alohida ahamiyatini ta’kidladi. «Ukrainadagi Rossiya salohiyatini yo‘q qilishning yagona yo‘li bor. Unga bosib olingan hududlarda chuqur zarba berish kerak, TAURUS esa Amerikaning ATACMS raketalari bilan birgalikda bu vazifani bajarish uchun eng zamonaviy qurol turi hisoblanadi. Agar biz front orqasida zarba berishni, ularning logistikasini buzishni, arsenallarini yo‘q qilishni xohlasak, buni faqat uzoq masofali raketalar yordamida amalga oshirish mumkin», - deya tushuntirdi Ukraina TIV rahbari. 

So‘rov: Nemislar Ukrainaning g‘alabasiga shubha bilan qarayapti 

Bild am Sonntag haftaligi buyurtmasi bilan Insa sotsiologik instituti tomonidan o‘tkazilgan so‘rov natijalariga ko‘ra, hozirda har yettinchi nemis (14 foiz) Ukrainaning Rossiya ustidan qozonadigan g‘alabasiga ishonadi. Bu bir yil oldingiga nisbatan olti foizga kam. 

Shu bilan birga, har to‘rtinchi nemis Rossiyaning g‘alabasiga ishonadi (26 foiz, +9 punkt), 47 foiz (-1 foiz) esa hech bir tomon g‘alaba qozona olmaydi degan fikrda.