Ukrainada asirlarning rossiyaliklar tomonidan otib tashlanishi ehtimoli tekshirilmoqda

Ukraina Bosh prokuraturasi Telegram’da qurolsiz ukrainalik harbiy asirlarning qatl etilishi tasvirlangan video e’lon qilinishi munosabati bilan qasddan odam o‘ldirish bilan bog‘liq urush qonunlari va urf-odatlarini buzish moddasi bo‘yicha sudgacha tergov boshladi. Hodisa Rossiya harbiylari tomonidan Ukrainaning Donetsk viloyatidagi Ivanovskoye va Xromovo qishloqlari o‘rtasida sodir etilgan bo‘lishi mumkin. Bu haqda 25 fevral, yakshanba kuni Telegram’da Ukraina Bosh prokuraturasi matbuot xizmati xabar berdi. 

Avvalroq Oliy radaning inson huquqlari bo‘yicha vakili Dmitriy Lubinets, o‘z ma’lumotlariga ko‘ra, Donetsk viloyati Baxmut tumanida sodir etilgan ukrainalik asirlarning otib tashlanishi haqida gapirgan edi. Ombudsman ma’lumotlariga ko‘ra, kamida yetti nafar ukrainalik harbiy halok bo‘lgan. 

24 fevraldan - Rossiyaning Ukrainaga keng ko‘lamli hujumi boshlangani ikki yilligi kuni - ijtimoiy tarmoqlarda video tarqalmoqda, unda mualliflar so‘zlariga ko‘ra, uchuvchisiz uchish apparati kamerasi otib tashlash paytini suratga olgan. Yozuvning haqiqiyligini aniqlash mumkin emas.

Bosh prokuratura: 45 nafar ukrainalik harbiy asirning o‘ldirilishi bo‘yicha tergov olib borilmoqda 

Ukrainaning DeepState loyihasiga ko‘ra, fojiali voqea Baxmut yaqinidagi Ivanovskiy hududida sodir bo‘lgan. Uning ma’lumotlariga ko‘ra, halok bo‘lgan harbiylar 92-alohida hujumkor brigadada xizmat qilgan bo‘lishi mumkin. Shu bilan birga, yetti emas, to‘qqiz kishi otib o‘ldirilgan, deydi DeepState. 

Ukraina Bosh prokuraturasi ma’lumotlariga ko‘ra, ayni paytda mamlakatda 45 nafar ukrainalik harbiy asirning o‘ldirilishi bilan bog‘liq 19 ta jinoiy ish bo‘yicha tergov harakatlari olib borilmoqda.