O‘zbekistonda Islom dunyosi ta’lim, fan va madaniyat tashkiloti vakolatxonasi ochilishi mumkin

Prezident Shavkat Mirziyoyev 30 may kuni Xiva shahrida bo‘lib o‘tadigan Islom hamkorlik tashkilotiga a’zo davlatlar turizm vazirlari yig‘ilishida ishtirok etish uchun yurtimizga kelgan Islom dunyosi ta’lim, fan va madaniyat tashkiloti (ICESCO) bosh direktori Salim al-Malikni qabul qildi. 

Ilm-fan, madaniyat, ta’lim va turizm sohalarida ushbu nufuzli mintaqaviy tuzilma bilan konstruktiv muloqot va samarali hamkorlikni rivojlantirishning amaliy jihatlari muhokama qilindi. 

Shuningdek, O‘zbekistonda ICESCO mintaqaviy vakolatxonasini ochish masalasi o‘rganib chiqilishi qayd etildi.

Shavkat Mirziyoyev tashkilot bilan o‘zaro manfaatli va jadal hamkorlikning bugungi darajasini alohida mamnuniyat bilan qayd etdi. 2007 yilda Toshkent shahri Islom madaniyati poytaxti deb e’lon qilingan, 2020 yilda Buxoro shahri, 2025 yil uchun esa Samarqand shahri ushbu maqomga ega bo‘ldi. Joriy yilda Xiva Islom dunyosining turizm poytaxti hisoblanadi. Toshkent shahridagi Xalqaro islom akademiyasida ICESCO Islom sivilizatsiyasini o‘rganish bo‘yicha maxsus kafedrasi faoliyat yuritmoqda. 

Hamkorlikning yangi yo‘nalishlari sifatida qo‘lyozmalar va boshqa tarixiy yodgorliklarni saqlash, restavratsiya qilish bo‘yicha tajriba almashish, bu boradagi loyihalarni amalga oshirish, arab tili o‘qituvchilarini tayyorlash va malakasini oshirish, xalqaro ilmiy va madaniy tadbirlarni tashkil etish belgilandi.