Isroil sudi ultra-ortodoksal talabalarni armiyaga chaqirish haqida qaror chiqardi

Isroil Oliy sudi 25 iyun, seshanba kuni bir ovozdan qabul qilingan qaror bilan hukumatga o‘ta ortodoksal yahudiylarni armiyaga chaqirishni buyurdi, mamlakatda endi buni kechiktirish va ularni boshqa chaqiriluvchilardan ajratish uchun qonuniy asos yo‘q. The Times of Israel sud qarorini «tarixiy» deb atadi: u «o‘nlab yillar davom etgan» jamoatchilik muhokamasiga nuqta qo‘ydi.

Sud qarorida aytilishicha, hukumat endi iyeshiva (diniy maktablar) talabalarini harbiy xizmatdan ozod qilish huquqiga ega emas va ultra-ortodoksal yahudiylar 1986 yilda qabul qilingan Armiya xizmati to‘g‘risidagi qonunga muvofiq, umumiy asosda chaqirilishi kerak. 

Sud, shuningdek, davlatga harbiy xizmatdan ozod qilinmaganlar uchun iyeshivada ta’lim olishini moliyalashtirishni to‘xtatishni buyurdi. 

Ultra-ortodoksal partiyalar sud qarorini tanqid qilmoqda 

Bosh vazir Binyamin Netanyahu koalitsion hukumatidagi o‘ta ortodoksal partiyalar vakillari Oliy sud qarorini qattiq tanqid qildi, deb yozadi The Times of Israel. ShAS partiyasi raisi Are Deri Tavrot - «Isroilning barcha dushmanlarga qarshi yashirin quroli» ekanligini va «dunyodagi hech bir kuch» yahudiy xalqining uni o‘rganishiga to‘sqinlik qila olmasligini aytdi. 

O‘ta ortodoksal partiyalarning keskin noroziligi hukmron koalitsiya parchalanishiga tahdid solmoqda, deb yozadi «Isroil yangiliklari» portali. 

Netanyahu hukumati iyeshiva talabalari uchun kechiktirishni uzaytiradi 

2017 yilda Oliy sud ultra-ortodoksallarni armiyaga chaqirmaslikka ruxsat beruvchi qonunni bekor qildi, biroq Binyamin Netanyahu hukumati maxsus farmonlar orqali ular uchun kechikishlarni muntazam ravishda uzaytirdi. Hukumat nazariy jihatdan bunday farmonlarni qayta qabul qilishi mumkin bo‘lsa-da, buni amalga oshirish «siyosiy jihatdan qiyin» bo‘ladi, chunki Netanyahuning «Likud» partiyasidan bir necha qonun chiqaruvchilar buni qo‘llab-quvvatlamasliklarini aytishgan, deb yozadi The Times of Israel.