CAS rossiyalik figurali uchuvchilarga Olimpiada «oltini»ni qaytarmadi

Sport arbitraj sudi (CAS) 25 iyul, payshanba kuni rossiyalik figurali uchuvchilar va Rossiya olimpiya qo‘mitasining (ROQ) Rossiya terma jamoasini 2022 yilgi Pekin Olimpiadasi oltin medalidan mahrum qilish haqidagi apellyatsiyasini rad etdi.

Rossiya konkida figurali uchish federatsiyasi (RKFUF) CAS qaroridan hafsalasi pir bo‘lganini bildirdi. «Huquqiy dalillar butunlay toza va adolatli kurashda medallarni qo‘lga kiritgan Rossiya jamoasi tomonida edi», deyiladi federatsiya rasmiy saytida chop etilgan rasmiy bayonotda. Shuningdek, sud qarorning faqat bir qismini asossiz e’lon qilgani qayd etilgan. 

«Qaror asoslarini o‘z ichiga olgan to‘liq hujjat taqdim etilishi bilan biz uni batafsil tahlil qilib, mazmun-mohiyati hamda sportchilarimizning huquq va manfaatlarini himoya qilish bo‘yicha keyingi qadamlarimiz bo‘yicha fikr-mulohazalarini bildirishimiz mumkin bo‘ladi», - deya qo‘shimcha qildi sport federatsiyasi.

Figurali uchish bo‘yicha Rossiya jamoasining Olimpiya «oltini»dan mahrum etilishi

29 yanvar kuni CAS rossiyalik figurali uchuvchi Kamila Valiyevani antidoping qoidalarini buzgani uchun to‘rt yilga diskvalifikatsiya qildi. Xususan, 2022 yilgi Pekin Olimpiadasida u figurali uchish bo‘yicha jamoaviy musobaqalarda qatnashdi, Rossiya unda birinchi o‘rinni egalladi.

CAS qaroriga ko‘ra, Xalqaro konkida uchish ittifoqi (ISU) Valiyevaning natijasini bekor qildi, natijada Rossiya terma jamoasi birinchi o‘rindan uchinchi o‘ringa tushib ketdi. Shu tariqa, AQSh terma jamoasi ushbu yo‘nalish bo‘yicha chempion bo‘ldi.