Rossiyada 6 oy ichida 40 mingga yaqin xorijlik deportatsiya qilindi

Mamlakat rasmiysi buni migratsiya siyosati kuchaytirilayotgani bilan izohladi.

Foto: RIA Novosti

2024 yilning birinchi yarmida «migratsiya qonunchiligini buzgan» 39,5 ming chet el fuqarosi va fuqaroligi bo‘lmagan shaxs Rossiyadan chiqarib yuborildi. Bu haqda Federal sud ijrochilari xizmatiga (FSPP) tayanib «Interfaks» xabar berdi.

Iyun oyida FSPP rahbari Dmitriy Aristov 2023 yilda Rossiyadan 44 ming migrant chiqarib yuborilganini aytgan edi.

«Joriy yilda bu boradagi ishlarimizda sezilarli o‘sish kuzatilmoqda. Atigi besh oy ichida biz 30 ming odamni chiqarib yubordik», dedi u.

Aristov «ishning sezilarli o‘sishini bashorat qildi, chunki mamlakat rahbariyatining qarorlariga muvofiq, migratsiya siyosati kuchaytirilmoqda».

Iyul oyida Rossiya Davlat Dumasi migrantlar bilan bog‘liq bir qancha qonunlarni qabul qildi. Ulardan biri migrantlarga atrof-muhitga g‘amxo‘rlik qilish, Rossiyaning tashqi va ichki siyosatiga aralashmaslik, shuningdek, «an’anaviy rus ma’naviy-axloqiy qadriyatlarini, shu jumladan turmush qurish g‘oyasini hurmat qilish» majburiyatini yuklaydi.