Qozog‘istonda prezident va Olimpiada sovrindorlari uchrashuvi boshqa sanaga qoldirildi

15 avgust kuni Qozog‘iston prezidenti Qosim-Jo‘mart To‘qayev Parij Olimpiadasi g‘oliblari va sovrindorlari bilan uchrashishni rejalashtirgan edi. Biroq bu tadbir keyinga qoldirildi, deb xabar berdi Kazinform.

Qozog‘iston prezident matbuot kotibi Berik Uali bergan ma’lumotga ko‘ra, sportchilarda koronavirus aniqlangan.

«Prezident Parij Olimpiadasi sovrindorlari va murabbiylarini davlat mukofotlari bilan taqdirlash to‘g‘risidagi farmonni imzoladi. To‘qayev bugun terma jamoa azolari bilan uchrashishni rejalashtirgandi. Afsuski, sportchilar va murabbiylarning yarmida koronavirus aniqlangan. Shuning uchun yig‘ilish qoldirildi. Sportchilar va murabbiylarning tezroq sog‘ayib ketishini tilab qolamiz», dedi u.

Uning ta’kidlashicha, davlat rahbari Olimpiya o‘yinlari sovrindorlarini albatta qabul qiladi. Yig‘ilish avgust oyining oxirida Oqo‘rdada o‘tkazilishi rejalashtirilgan.

Qozog‘istonlik sportchilar Parij olimpiadasida 1 ta oltin, 3 ta kumush va 3 ta bronza medalini qo‘lga kiritib, umumjamoa reytingida 43-o‘rinni egalladi.