Isroil «Hizbulloh» yetakchisi Hasan Nasrulloh o‘ldirilganini e’lon qildi

Isroil mudofaa kuchlari (TsAHAL) Isroilning Bayrutga bergan zarbasi natijasida «Hizbulloh» harakati rahbari Hasan Nasrulloh o‘lganini ma’lum qildi.

«Hizbulloh» tashkiloti rahbari va uning asoschilaridan biri Hasan Nasrulloh «Hizbulloh» janubiy fronti qo‘mondoni Ali Karki va boshqa «Hizbulloh» qo‘mondonlari bilan birga TsAHAL tomonidan yo‘q qilindi», — deyiladi Isroil armiyasi 28 sentabr, shanba kuni bergan bayonotida.

Jangchilar yetakchisi bir kun avval, «Hizbulloh» rahbariyati uchrashuv o‘tkazgan Bayrut janubi Dahiya tumanidagi guruh qarorgohiga berilgan «aniq havo hujumi» natijasida o‘ldirilgan, deya xabar beradi TsAHAL.

Hasan Nasrulloh Livandagi harakatga o‘ttiz yildan ortiq rahbarlik qilgan.

Isroil Livanda «Hizbulloh» yetakchilari yo‘q qilingani haqida xabar berdi

28 sentabrga o‘tar kechasi TsAHAL  Livan janubida «Hizbulloh» raketa bo‘linmasi qo‘mondoni Muhammad Ali Ismoil va uning o‘rinbosari Husayn Ahmad Ismoil yo‘q qilinganini ma’lum qildi. Aytilishicha, ular bilan birga guruhning o‘sha bo‘linmasining yana bir qancha komandirlari yo‘q qilingan.

«Muhammad Ali Ismoil Isroil davlatiga qarshi ko‘plab terrorchilik xurujlari, jumladan, Isroil hududiga raketa hujumi uyushtirish va chorshanba kuni Isroil markaziga «yer-yer» sinfidagi raketa uchirilishi uchun javobgardir», — deyiladi TsAHALning Telegram-kanalida.

Netanyahu: Isroil «Hizbulloh»ni yo‘q qilishga «to‘liq haqli»

Binyamin Netanyahu 27 sentabr kuni BMT Bosh Assambleyasidagi nutqi chog‘ida Isroil «isroilliklarni Livan bilan chegaradagi uylariga qaytarish uchun «Hizbulloh»ni yo‘q qilishga to‘la haqli», deb ta’kidladi. «Terrorchilar El-Paso va San-Diyego (Meksika bilan chegaradosh Amerika shaharlari)ni arvoh shaharlarga aylantirgan holatni tasavvur qilib ko‘ring. AQSh hukumati bunga qachongacha chidagan bo‘lardi?» dedi u. So‘ngra Isroil «bir yildan beri bu chidab bo‘lmas vaziyatga chidab kelayotganini» qo‘shimcha qildi.