Xitoy Rossiya va KXDR o‘rtasidagi «munosabatlar»ni «ularning shaxsiy ishi» deb atadi

Xitoy Rossiya va Shimoliy Koreya o‘rtasidagi tobora mustahkamlanib borayotgan munosabatlarni o‘z ishi deb hisoblamaydi. «Rossiya va KXDR ikki mustaqil va suveren davlatdir va ikki tomonlama munosabatlarni rivojlantirish faqat shu ikki davlatning ishi», — dedi Xitoy Xalq Respublikasi Tashqi ishlar vazirligi matbuot kotibi Lin Jiang 1 noyabr, juma kuni Pekindagi brifingda.

Lin Jiang, shuningdek, «Xitoy Moskva va Pxenyan o‘rtasidagi ikki tomonlama almashinuv va hamkorlikdagi o‘ziga xos vaziyatdan xabardor emasligini» qo‘shimcha qildi. Pekin hali ham «tomonlar vaziyatni yumshatishga intilib, Ukraina inqirozi (Rossiyaning Ukrainaga qarshi urushi)ga siyosiy yechim yo‘lida harakat qiladi, deb umid qilmoqda», deya xabar berdi u.

AQSh Xitoyni KXDR askarlari Rossiyadan olib chiqib ketilishiga erishishga chaqirdi

Qo‘shma Shtatlar Xitoyni Rossiya Federatsiyasida joylashgan Shimoliy Koreya qo‘shinlarini doimiy joylashtirish joylariga qaytarishga erishishga chaqirdi. Vashington Xitoy hukumatidan aloqalarni davom ettirayotgan Shimoliy Koreya rahbariyatiga bosim o‘tkazishni so‘radi, deb xabar berdi CNN 30 oktyabr kuni nomi oshkor etilmagan amerikalik rasmiylarga tayanib.

Ulardan birining aytishicha, AQSh prezidentining milliy xavfsizlik bo‘yicha maslahatchisi Jyeyk Sallivan ham Shimoliy Koreya qo‘shinlarining Rossiyaga yuborilishi bilan bog‘liq vaziyat yuzasidan bir qator boshqa davlatlarni Pekin bilan bog‘lanishga ko‘ndirish haqida ko‘rsatma bergan. Biroq CNN suhbatdoshlari G‘arb rasmiylari bu masala bo‘yicha «Xitoy Shimoliy Koreyaning rejalariga xalaqit berishi yuzasidan optimistik kayfiyatda emasligini» tan olgan.