Qozog‘iston Rossiyaga qarshi qaysi sanksiyalarga amal qilmasligi ma’lum bo‘ldi

Qozog‘iston o‘z iqtisodiyotiga zarar yetkazadigan Rossiyaga qarshi sanksiyalarga rioya qilmaydi. Bu haqda mamlakat bosh vaziri o‘rinbosari Serik Jumangarin ma’lum qildi.

«Gap shundaki, bizda ishlab chiqariladigan ma’lum tovarlar sanksiyalar ro‘yxatiga kiritilgan. Ammo biz bu tovarlarga hech qanday cheklovlar qo‘ymoqchi emasmiz, chunki buning orqasida katta mehnat jamoalari, ba’zan bu ishlab chiqarish obektlari joylashgan butun monoshaharlar bor, shuning uchun bu juda muhim», dedi u.

Shu bilan birga, Qozog‘iston sanksiya cheklovlarini chetlab o‘tuvchi davlat sifatida harakat qilmoqchi emas, dedi bosh vazir o‘rinbosari.

Jumangarin avvalroq Qozog‘iston Rossiyaga qarshi sanksiyalarga «ko‘r-ko‘rona amal qilmasligini» aytgan edi, ayniqsa, ular mahalliy kompaniyalar manfaatlariga daxldor bo‘lsa.

«Biz ishlab chiqaruvchilarimizga savdoni taqiqlashlariga yo‘l qo‘ymaymiz», dedi u.

Shu bilan birga, Jumangarinning tushuntirishicha, Qozog‘iston hali ham asosiy cheklovlarga rioya qilishda davom etadi, chunki u G‘arbning to‘g‘ridan-to‘g‘ri sanksiyalariga «bardosh berolmaydi».

Qozog‘iston Rossiyaga qarshi xalqaro sanksiyalarga ochiq qo‘shilmadi, biroq ko‘pgina savdo cheklovlariga rioya etishga harakat qilmoqda. Shunga qaramay, ba’zi Qozog‘iston kompaniyalari G‘arb davlatlarining sanksiyalariga uchragan.