Turkiyada portlovchi moddalar ishlab chiqaruvchi zavodda portlash sodir bo‘ldi

Turkiya shimoli-g‘arbidagi Baliqesir viloyatida joylashgan portlovchi moddalar ishlab chiqarish zavodida yuz bergan portlash oqibatida kamida 12 kishi halok bo‘ldi va to‘rt kishi jarohat oldi. Bu haqda mamlakat ichki ishlar vaziri Ali Yerlikayaga tayanib, Haberturk nashri xabar berdi.

Viloyat gubernatori Ismoil Ustao‘g‘luning ma’lum qilishicha, hukumat sodir bo‘lgan voqeani qo‘poruvchilik deb hisoblamayapti. Uning so‘zlariga ko‘ra, portlash oqibatida zavod binosining bir qismi qulab tushgan.

CNN Turk telekanali portlashdan keyingi kadrlarni e’lon qildi.

BBC’ning yozishicha, zavod ovchilik va sport uchun mo‘ljallangan anjomlar, shuningdek, fuqarolik foydalanuvi uchun portlovchi moddalar ishlab chiqarish bilan shug‘ullanadi.

Turkiya prezidenti Rajab Toyyib Erdo‘g‘an X ijtimoiy tarmog‘idagi sahifasiga 12 kishining o‘limidan «chuqur qayg‘uda» ekanini yozib qoldirdi. Davlat rahbari halok bo‘lganlarning oilalariga hamdardlik bildirdi.