Rossiya va Ukraina ombudsmanlari harbiy asirlar bilan suhbatlashdi

30 dekabr kuni Rossiya Federatsiyasidagi Inson huquqlari bo‘yicha vakil Tatyana Moskalkova va Ukraina Oliy radasining Inson huquqlari bo‘yicha vakili Dmitriy Lubinets o‘rtasida uchrashuv bo‘lib o‘tdi.

Bu haqda Rossiya ombudsmani Telegram ijtimoiy tarmog‘idagi postida ma’lum qildi.

«Biz ikki tomondan harbiy asirlar bilan suhbatlashdik, gumanitar aloqalar, tinch aholini qaytarish, oilalarni birlashtirish istiqbollarini muhokama qildik», — dedi Tatyana Moskalkova.

Dmitriy Lubinets, o‘z navbatida, Moskalkova bilan uchrashuvi haqida gapirdi.

Uning so‘zlariga ko‘ra, tomonlar tinch aholini qaytarish, oilalarni birlashtirish va boshqa gumanitar tashabbuslarni yanada amalga oshirish mavzusini ko‘targan.

«Ukraina uchun Jyeneva konvensiyalarining ustuvorligi va inson huquqlari hurmat qilinishi muhim. Shuning uchun men har bir uchrashuvda buni ta’kidlayman! Biz barcha ukrainaliklarni vatanga qaytarish ustida ishlashda davom etamiz!» - dedi u.