Britaniyada 52 yil oldin bedarak yo‘qolgan ayol topildi

Britaniyada 52 yil oldin yo‘qolgan ayol politsiya uning suratini ijtimoiy tarmoqlarda e’lon qilganidan keyin topildi. Shunday qilib mamlakatda bedarak yo‘qolishga oid eng uzoq davom etgan ishga yakun yasaldi, deb yozadi The Guardian.

Qayd etilishicha, 68 yoshli Sheyla Foks 1972 yilda, 16 yoshligida Koventrida yo‘qolib qolgan. U vaqtda Uest-Midlends politsiyasi qiz ota-onasi bilan yashagani va bir erkak bilan munosabatda bo‘lganiga oid taxminni ilgari surgan. Politsiya o‘shanda qiz o‘z xohishi bilan ketib qolgan bo‘lishi mumkinligini aytgan edi.

29 yanvar kuni Uest-Midlends politsiyasi Foksni topish bo‘yicha yangi chaqiriq bilan murojaat qilib, uning 16 yoshligidagi suratini ijtimoiy tarmoqlardagi sahifasiga joylashtirgan. Oradan bir necha soat o‘tib jamoatchilik vakillari politsiya bilan bog‘langan, 1 yanvar kuni esa huquq-tartibot organlari Foks tirik ekanini tasdiqlagan.

Ma’lum bo‘lishicha, ayol hozirda mamlakatning boshqa qismida istiqomat qilmoqda. «Biz Uest-Midlends politsiyasida bedarak yo‘qolganlik holati bo‘yicha eng uzoq davom etgan ishlardan biri yakunlangani to‘g‘risida xabar berishdan mamnunmiz», — deydi mahalliy politsiya vakili.

Eslatib o‘tamiz, 2019 yilda elekrichkada yo‘qolib qolgan belaruslik qiz 20 yildan so‘ng Rossiyada topilib, ota-onasiga qaytarilgan edi.