Kurskka hujum ko‘lami qanday va undan maqsad nima?

Donbassda muvaffaqiyatsizlikka uchrayotgan Ukraina qurolli kuchlari 5 yanvar kuni Kursk frontida hujumga o‘tdi. Mavzu borasidagi savollarga Kun.uz studiyasida siyosiy fanlar bo‘yicha falsafa doktori Jahongir Akramov javob berdi.

— Kurskdagi yangi hujum to‘lqini nega aynan hozir boshlandi va hujumning asosiy sababi nima?

— Ukrainaning 2024 yildagi eng katta mag‘lubiyati frontda emas, balki AQShdagi saylovda bo‘ldi. Trampning saylanishi Ukrainaning pozitsiyasini kuchsizlantirdi. Kutilayotgan muzokaralarda Rossiyaning suveren hududini egallash Ukrainaga ustunlik berishi mumkin. Rossiya o‘z hududi Ukraina qo‘lida qolmasligi uchun Ukrainadan tortib olingan shaharlarni tark etishi mumkin.

— Ukraina armiyasi hujum qilgan hudud Kursk oblastining qaysi tumanlariga to‘g‘ri keladi?

— Mutaxassislar bu yurishni to‘laqonli harbiy yurish sifatida baholagani yo‘q. Chunki hujum kichik hududda, cheklangan resurslar bilan amalga oshirilmoqda va unda 6-8 ming nafar askardan iborat uchta brigada qatnashyapti xolos. To‘laqonli harbiy operatsiya sifatida baholanishi uchun hujum keng hududlarni qamragan holda amalga oshirilishi kerak. Hozirda hujum ko‘proq Bolshaya Soldatskaya tumanida sodir bo‘lmoqda.

Sudja tumanining asosiy markazlari ukrainlar nazorati ostida. Ular Bolshaya Soldatskaya tumaniga, ya’ni Sudjaning shimoli-sharqiga yurish qilib, bu yerdagi ayrim aholi markazlarini egallab olishdi. Urushni o‘rganish institutining bergan xaritalariga ko‘ra, ular bir kunda taxminan 4 kilometrga olg‘a siljishgan. Bu hujumlar boshqa frontlarga ta’sir qilish va Rossiyani boshqa frontlardagi harbiylar Kurskka jalb qilishga undashi uchun qilinyapti. Lekin bu hujumlar oxirgisi emas, mutaxassislar yanvar oyining Belovskiy va Korniyevskiy tumanlarga ham hujumlar bo‘lishi mumkinligi haqida taxmin qilmoqda.

— Trampning Rossiya-Ukraina bo‘yicha maxsus vakili Kit Kellog yanvar oyida o‘tkazilishi kerak bo‘lgan muzokaralar kechiktirilishini aytdi. Bu ham Kurskdagi vaziyat bilan bog‘liqmi?

— AQShning Ukraina bo‘yicha vakili Kit Kellog harbiy tajribaga ega shaxs va mazkur operatsiyaning ahamiyatini juda yaxshi tushunadi, shu sababli u operatsiya tugashini kutayotgan bo‘lishi hamda muzokaralarni hujum natijasiga bog‘liq tarzda tashkil qilishni rejalashtirgan bo‘lishi mumkin.

Oxirgi paytlarda butun dunyoda bo‘layotgan turli siyosiy o‘zgarishlar va hokimiyat almashishlari natijasida, Ukrainadagi urush masalasi trenddan biroz tushgan edi. Shuning uchun Ukrainaning hujumini axborot trendini saqlab qolishga bo‘lgan urinish sifatida ham ko‘rishimiz mumkin. Chunki jahon va ayniqsa G‘arb jamoatchiligining e’tibori qanchalik ko‘p Ukrainada bo‘lsa, bu G‘arbdagi siyosiy liderlarga bosimni oshiradi.

NormuhammadAli Abdurahmonov suhbatlashdi.