Eron birinchi drontashuvchi kemani taqdim etdi

Eron o‘z harbiy-dengiz kuchlari safiga dronlarni tashish imkoniyatiga ega «Martyr Bagheri» kemasini qabul qildi, deb xabar berdi Tasnim.

Kema bir nechta dron eskadrilyasini joylashtirish, jangovar dronlarni uchirish va boshqa shunga o‘xshash apparatlarni boshqarishga qodir.

Bundan tashqari, «Martyr Bagheri» yengil va tezkor jangovar kemalarni suvga tushirishi, harbiy va yordamchi vertolyotlarni tashishi mumkin. U vertolyotlarni uchirish uchun mobil platforma bilan jihozlangan va yuqori tezlikdagi zarba berish tizimlarini qo‘llab-quvvatlaydi. Kema ochiq okeanda 9 balli dovul sharoitida va 22 ming dengiz mil masofaga suzish quvvatiga ega. Bu esa unga yoqilg‘i quyishsiz bir yilgacha davom etadigan missiyalarni bajarish imkonini beradi.

Islom inqilobi qo‘riqchilari korpusi (IIQK) Harbiy-dengiz kuchlari qo‘mondoni, admiral Alirizo Tangsiriy so‘zlariga ko‘ra, kema ikki yil ichida tijorat kemasini qayta jihozlash orqali qurilgan.