HAMAS garovdagi yana uch nafar isroillikni ozod qildi

Bunga javoban Isroil 183 nafar falastinlik mahbusni qo‘yib yuboradi.

Foto: BBC

Falastinning HAMAS guruhi garovga olingan uch nafar isroillikni Qizil Xoch tashkiloti xodimlariga topshirdi. Ozod qilinganlar: 53 yoshli Eli Sharabi, 56 yoshli Ohad Ben-Ami va 34 yoshli Or Levi.

Qizil Xochga topshirilishidan oldin HAMAS garovga olinganlar tashviqot nutqlarini o‘qishga majburlangan ommaviy marosim o‘tkazdi. Isroil bosh vaziri Binyamin Netanyahuning idorasi «bugun ko‘rilgan dahshatli tasvirlarni javobsiz qoldirmaslikni» aytdi.

Ozod qilingan garovdagilar evaziga Isroil bir kun ichida 183 nafar falastinlik mahbusni qo‘yib yuboradi, ulardan 18 nafari umrbod qamoq jazosiga hukm qilingan. Ozod qilingan mahkumlarning 7 nafari ozod etilganidan so‘ng darhol deportatsiya qilinadi.

Bu 19 yanvardan kuchga kirgan sulh bitimidan keyin beshinchi almashinuv bo‘ldi.

Avvalgi to‘rtta almashinuvda HAMAS garovdagi 18 nafar isroillikni, jumladan, besh nafar Tailand fuqarosini ozod qildi. Isroil 400 mahbusni, jumladan, umrbod qamoq jazosiga hukm qilinganlarni va uzoq muddat sudsiz ushlab turilganlarni qo‘yib yubordi.

#Isroil #sulh #HAMAS

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.