Gvatemalada yo‘lovchi avtobusi ko‘prikdan jarga quladi. Kamida 51 kishi halok bo‘ldi

Gvatemalda yo‘lovchi avtobus ishtirokida yuz bergan yo‘l-transport hodisasi oqibatida kamida 51 kishi halok bo‘ldi, deb xabar beradi Reuters.

Agentlik ma’lumotlariga ko‘ra, avtobus San-Agustin-Akasaguastlan shahridan mamlakat poytaxti tomon harakatlanayotganida ko‘prikdan jarlikka qulagan.

Mahalliy nashrlarning yozishicha, hodisa avtobus haydovchisi boshqaruvni yo‘qotishi oqibatida yuz bergan. Avtobus bir nechta avtomobil va ko‘prikning metall panjaralariga urilgan, so‘ng daryo oqib o‘tuvchi jarlikka qulagan.

Hodisa joyidan olingan suratlardan ko‘rish mumkinki, avtobusni qisman suv bosgan. Taxminlarga ko‘ra, avariyaga avtobusning tormoz tizimidagi nosozlik sabab bo‘lgan.

Fojia oqibatida 36 nafar ayol va 15 nafar erkak halok bo‘lgan. Gvatemalada uch kunlik milliy motam e’lon qilindi.