Yaponiyada uch kundan beri o‘rmon yong‘inlari davom etmoqda. 3 ming kishi evakuatsiya qilindi

Yaponiya shimoli-sharqidagi Ofunato shahrida (Ivate prefekturasi) uch kundan beri davom etayotgan o‘rmon yong‘inlari kamida 1,2 ming gektar maydonni qamrab oldi, deb xabar beradi Kyodo agentligi.

Mahalliy hukumatning ta’kidlashicha, bu mamlakatda so‘nggi 30 yil ichida kuzatilgan eng yirik o‘rmon yong‘ini hisoblanadi.

Yong‘in sabab 3 ming kishi evakuatsiya qilingan. Yong‘inlar va tabiiy ofatlarga qarshi kurashish agentligi yaqin atrofdagi sakkizta prefekturadan o‘t o‘chiruvchilarni chaqirgan va hozirda 690 kishidan iborat shaxsiy tarkib alangaga qarshi kurashmoqda. Mamlakat bosh vaziri Sigeru Isiba hukumati yong‘inni o‘chirishga 15 ta vertolyot jalb etgan va suv tashishga mo‘ljallangan yirik samolyotlar sonini oshirgan.

Ma’lumotlarga ko‘ra, 26 fevral kuni boshlangan yong‘in hozirda bir kishining o‘limiga olib kelgan va 80 dan ortiq uyni kulga aylantirgan. 27 fevral kuni yaqin atrofdagi maktab va bog‘chalar yopilgan, Ofunatodagi 500 ta xonadon elektr ta’minotisiz qolgan. Bundan tashqari, shahardagi temiryo‘l tarmog‘i faoliyati ham to‘xtatilgan.