Yaponiyada o‘rmon yong‘inlari 2,6 ming gektar maydonni qamrab oldi

Yaponiya shimoli-sharqidagi Ivate prefekturasida boshlangan o‘rmon yong‘inlari olti kundan beri davom etmoqda. Alanga hozirga qadar Ofunato shahri hududining 8 foizini kulga aylantirdi, deb yozadi NHK.

Rasmiylarning ta’kidlashicha, 3 mart kuni tongdan beri yana 500 gektar maydon yonib ketgan va 4 mart soat 06:00 holatiga ko‘ra, alanga qamrab olgan jami hudud 2,6 ming gektarga yetgan.

Hozirda yong‘inni o‘chirishga qariyb 2 ming o‘t o‘chiruvchi jalb etilgan, Mudofaa kuchlari vertolyotlari esa havodan suv sepmoqda.

Prefektura ma’muriyatining ma’lum qilishicha, yong‘in Sanrikutyo Ryori tumaniga ham tarqalgan. Ofunato ko‘rfazidan shimoli-sharqda joylashgan Akasakityo Nagasaki yaqinidagi o‘rmonlarda ham tutun borligi tasdiqlangan.

Shahar hukumati Sanrikutyo va Akasakityo hududlari aholisini evakuatsiya qilish bo‘yicha buyruq bergan. 4 mart kuni soat 07:00 holatiga ko‘ra, 12 ta obektdan 1215 kishi evakuatsiya qilingan.

Prognozlarga ko‘ra, 5 mart kuni yarim tundan erta tongga qadar qor yog‘ishi va u tushdan boshlab yomg‘irga aylanishi kutilmoqda.

Avvalroq 26 fevral kuni boshlangan yong‘in bir kishining o‘limiga sababchi bo‘lgani va 80 dan ortiq uyni kulga aylantirgani to‘g‘risida xabar berilgandi.