Jizzaxda haydovchi yoqilg‘i baki qopqog‘ini yopmagani uchun zapravka xodimini kaltakladi

Jizzax viloyati Sharof Rashidov tumanida haydovchi avtomobillarga yoqilg‘i quyish shoxobchasi xodimini kaltakladi, deya xabar bermoqda viloyat IIB.

Holat 25 mart kuni soat 14:00 atrofida sodir bo‘lgan. 37 yoshli haydovchi Gentra mashinasiga yoqilg‘i quyish maqsadida Pastki Suloqli mahallasida joylashgan AYoQShga kelib, benzin uchun to‘lov qilgan.

U yonilg‘ini o‘zi quya olmasligini aytganidan keyin 43 yoshli operator mashinaga yonilg‘i quygan. Shundan keyin esa haydovchi u bak qopqog‘ini yopmaganini ro‘kach qilib, janjal boshlagan.

So‘ngra yoqilg‘i quyish pistoletlarini uloqtirib, ishchiga hamla qilgan, uni urib tepib, tan jarohati yetkazgan.

Mazkur holat yuzasidan tergovga qadar surishtiruv ishlari olib borilib, hozirda sud tibbiy ekspertiza tayinlangan.

«Zo‘ravonni javobgarlikka tortish choralari ko‘rilmoqda», deyiladi xabarda.