Tailandga ishlash uchun borib, og‘ir kasallikka chalingan O‘zbekiston fuqarosi vatanga qaytarildi

Tailandning Pattaya shahriga ishlash uchun borib, insultga chalingan I.S. ismli O‘zbekiston fuqarosi vatanga qaytarildi.

Qayd etilishicha, u og‘ir jarrohlik operatsiyasini boshdan kechirgan. Amalga oshirilgan muolajalarga qaramay, bemor tanasining chap tomoni ishlamay qolgan. I.S. Tailandga ishlash maqsadida borgan, ammo tibbiy sug‘urta olmagan, shuningdek, ish beruvchi bilan mehnat shartnomasini ham tuzmagan. Ushbu holatlar tibbiy xarajatlarni to‘lashda qiyinchiliklar sabab bo‘lgan.

28 mart kuni bemorning yaqinlari, do‘stlari va faol vatandoshlar sa’y-harakatlari bilan tibbiy xarajatlarni qoplash hamda Uzbekistan Airways milliy aviakompaniyasi samolyoti orqali bemorni O‘zbekistonga qaytarish uchun zarur mablag‘ yig‘ilgan.

Bunday holatlar ko‘payib borayotgani sabab Bangkokdagi Bosh konsulxona O‘zbekiston fuqarolariga chet elga sayohat qilish yoki ishlash uchun ketayotganda tibbiy sug‘urta olish, shuningdek, ish beruvchi bilan mehnat shartnomasini tuzish zarurligini eslatib o‘tadi.

Avvalroq O‘zbekiston Bosh konsulxonasi ko‘magida Birlashgan Arab Amirliklarining Dubay shahrida mushkul ahvolda qolgan uch nafar ayol vatanga qaytgani, Rossiyaga ishlash uchun borgan o‘zbekistonlik mustaqil harakatlanish imkoniyatidan mahrum bo‘lib, kasalxonaga tushib qolgani to‘g‘risida xabar berilgandi.