Rossiya va Ukraina bir-birini energetika obektlariga zarba berishda davom etayotganlikda aybladi

Rossiya Ukrainani energetika obektlariga zarba berishga qo‘yilgan moratoriyni buzayotganlikda aybladi va BMT bilan AQSh rasmiylariga shikoyat qildi. Bu haqda Rossiya tashqi ishlar vazirligi rahbari Sergey Lavrov ma’lum qildi.

Lavrov so‘zlariga ko‘ra, Rossiya Xavfsizlik kengashining so‘nggi yig‘ilishida mudofaa vaziri Andrey Belousov prezident Vladimir Putinga «moratoriyga rioya qilinmayotgani, Rossiya energetika obektlari shu vaqt davomida, ehtimol, bir yoki ikki kunlik tanaffus bilan zarbalarga uchrayotganini» aytgan.

«Biz Xavfsizlik Kengashi yig‘ilishida Andrey Belousov keltirgan qoidabuzarliklar ro‘yxatini AQSh Milliy xavfsizlik bo‘yicha maslahatchisi Mayk Uolsga topshirdik. Men bu ro‘yxatni AQSh Davlat kotibi Marko Rubioga yubordim, biz uni BMT va YeXHT vakillarimizga yubordik, ular, umuman olganda, o‘z ishida Ukrainaning amaldagi hukumati va’dalari narxini, agar uni hukumat deb atash mumkin bo‘lsa, aniq faktlar bilan ko‘rsatsin», dedi Lavrov.

Rossiya va Ukraina mart oyi oxirida AQSh bilan energetika obektlariga zarba bermaslik haqida alohida kelishib olgan edi. Tomonlar muntazam ravishda bir-birlarini ushbu cheklovlarni buzganlikda ayblab keladi. Shuningdek, o‘ziga qo‘yilgan ayblovlarni rad etadi.

1 aprel kuni Rossiya Mudofaa vazirligi Ukraina qurolli kuchlari Zaporojiye viloyatining bosib olingan qismidagi elektr nimstansiyasiga va Belgorod viloyatidagi transformator nimstansiyasiga zarba berganini ma’lum qildi.

1 aprel kuni Ukraina Tashqi ishlar vazirligi rossiyalik harbiylar Xersondagi energetika inshootiga zarar yetkazgani, 45 ming kishi elektrsiz qolgani haqida ma’lum qildi.