Isroil harbiy amaliyotini kengaytirmoqda va G‘azoda yangi hududlarni egallamoqchi

Vazirning so‘zlariga ko‘ra, amaliyot kengaytirilishi «hududni terrorchilar va terrorchilik infratuzilmasidan yo‘q qilish va tozalash»ni maqsad qilgan hamda falastinliklarni keng ko‘lamli evakuatsiya qilishni talab etadi.

Isroil harbiylari allaqachon anklav janubidagi Rafah va Xon Yunus shaharlari yaqinida yashovchi g‘azoliklarni evakuatsiya haqida ogohlantirib, ularga avvalroq gumanitar zona deb e’lon qilingan sohil bo‘yidagi Al-Mavasi hududiga ko‘chib o‘tishga ko‘rsatma bergan.

Kats janglar ketayotgan hududlar aholisi evakuatsiya qilinishini aytdi, G‘azo aholisini Hamasni yo‘q qilishga va garovga olingan isroilliklarni qaytarishga chaqirib, bu urushni to‘xtatishning yagona yo‘li ekanini ta’kidladi.

Katsning bayonotida Isroil aynan qaysi hududni egallamoqchi ekaniga aniqlik kiritilmagan.

Isroil qo‘shinlari allaqachon G‘azoda muhim bufer zona yaratgan – urushdan oldin anklav chegaralari bo‘ylab mavjud bo‘lgan hudud kengaytirilgan va G‘azo markazidan o‘tuvchi Netsarim deb ataladigan yo‘lakda katta xavfsizlik zonasi qo‘shilgan.

Isroilning Misr bilan chegarasi bo‘ylab shiddatli aviazarbalari haqida xabarlar kelmoqda, bundan esa Isroilning G‘azoda quruqlik orqali yangi yirik hujumi yaqin vaqtlar ichida boshlanishi haqida taassurot paydo bo‘lmoqda.

Reuters agentligi qayd etishicha, Isroil yetakchilarini 2007 yildan beri anklavni nazorat qilib kelayotgan Hamasga qarshi norozilik alomatlari ruhlantirmoqda. Amaliyotni kengaytirish orqali G‘azo aholisining guruhga bosimini kuchaytirish ham maqsad qilingan.

«Men G‘azo aholisini Hamasni yo‘q qilish va o‘g‘irlanganlarning barchasini qaytarish uchun zudlik bilan harakat qilishga chaqiraman. Bu urushni tugatishning yagona yo‘li», – dedi Kats va amaliyot orqali hudud jangarilar va ularning infratuzilmasidan tozalanishini qo‘shimcha qildi.

Avvalroq Isroil bosh vaziri Binyamin Netanyahu Hamasga qurollarni tashlash haqidagi chaqirig‘ini takrorlagan va harbiy bosim qo‘llash garovda qolayotgan 59 kishini qaytarishning eng yaxshi usuli ekanini aytgandi.

Isroil hukumati 18 mart kuni G‘azoga yangi hujum boshlagan va Hamasni AQShning sulh rejimini uzaytirish va G‘azoda hamon asirlikda ushlab turilgan 59 kishini ozod qilish bo‘yicha yangi taklifini rad etishda ayblagandi.

O‘z navbatida, Hamas Isroilni yanvar oyida erishilgan dastlabki kelishuvni buzishda aybladi.

Garovga olinganlar va bedarak yo‘qolganlarning oilalari forumidagilar harbiy amaliyot kengaytirilishi haqidagi xabardan «dahshat bilan uyg‘onganishgani»ni aytishgan. Guruh o‘z bayonotida Isroil hukumatini birinchi navbatda G‘azoda qolayotganlarning barchasini ozod qilishni ta’minlashga chaqirdi.

«Isroil hukumati kelishuv natijasida garovga olinganlarni ozod qilish va urushni to‘xtatish o‘rniga G‘azoga, avval ham bir necha bor jang qilgan joylariga yangi qo‘shinlarni yubormoqda», –deyiladi forum bayonotida.

So‘nggi haftalarda G‘azodagi gumanitar vaziyat keskin yomonlashdi, Isroil 2 martdan beri G‘azo sektoriga yordam yuborishdan bosh tortmoqda – bu urush boshlanganidan beri eng uzoq davom etgan blokadadir.

O‘tgan oyda BMT G‘azodagi insonparvarlik amaliyotlarini qisqartirishini e’lon qilgandi. Bu qaror G‘azo janubida Isroil qo‘shinlari falastinlik sakkiz nafar shifokor, fuqarolik mudofaasining olti nafar xodimi hamda BMTning bir nafar xodimi o‘ldirishi ortidan qabul qilingandi.

Isroil harbiylari 2023 yil 7 oktyabrda falastinliklarning reydida 1200 ga yaqin odam halok bo‘lib, 251 kishi garovga olinishiga javoban Hamasni yo‘q qilish kampaniyasini boshlagandi.

Hamas nazorati ostidagi G‘azo sog‘liqni saqlash vazirligi ma’lumotlariga ko‘ra, sektor hududidagi urush davrida 50 mingdan ortiq falastinlik halok bo‘lgan.