Rossiya Kriviy Rigga yana zarba berdi: kamida 19 kishi halok bo‘ldi

2025 yil 4 aprel, juma kuni Rossiya Kriviy Rigga yangi raketa zarbasi berdi. Kriviy Rig mudofaa kengashi raisi Aleksandr Vilkulning shu kuni yarim tunda xabar berishicha, hujum oqibatida kamida 19 kishi, jumladan 9 nafar bola halok bo‘lgan. Yana 56 kishi jarohatlangan. Bir nechta manbalar darhol "Magellan" restorani yonida rus raketasi portlagani haqida xabar berishdi.

O‘z navbatida, Dnipropetrovsk viloyati ma’muriyati rahbari Sergey Lisak shaharda yigirmaga yaqin ko‘p qavatli uy, o‘ttizdan ortiq avtomobil, ta’lim muassasalari va umumiy ovqatlanish obektlari zarar ko‘rganini ma’lum qildi.

Kriviy Rigga qilingan hujumni Ukraina prezidenti Volodimir Zelenskiy izohladi. «Rossiya har kuni zarba beradi. Har kuni odamlar halok bo‘lmoqda. Buning davom etishiga birgina sabab bor: Rossiya o‘t ochishni to‘xtatishni istamayapti va biz buni ko‘rib turibmiz. Buni butun dunyo ko‘rib turibdi. Har bir raketa, har bir hujumkor dron Rossiya faqat urushni xohlashini isbotlaydi», — deb yozgan Zelenskiy. Uning so‘zlariga ko‘ra, zarba turar joy binolari joylashgan hududga berilgan. Bir kun avval Rossiyaning shaharga bergan zarbasi oqibatida kamida to‘rt kishi halok bo‘lgan, yana 14 kishi yaralangan edi.