Shols Rossiyaning Sumi shahriga zarbasini «vahshiyona hujum» deb atadi

Germaniya kansleri vazifasini bajaruvchi Olaf Shols Rossiya qurolli kuchlarining Ukraina shimoli-sharqidagi Sumi shahriga bergan zarbasini «vahshiyona hujum» deb atadi. Shols tegishli xabarni 13 aprel, yakshanba kuni X ijtimoiy tarmog‘ida joylashtirdi.

«Yakshanba kuni Rossiya raketalari begunoh tinch aholini o‘ldirgan Sumidan olingan kadrlar dahshatli. Bizning fikrimiz qurbonlarning oila a’zolari va yaradorlar bilan. Germaniya bu vahshiy hujumni eng keskin tarzda qoralaydi», — deb yozdi Shols.

«Rossiyaning bunday hujumlari Rossiyaning go‘yoki tinchlikka tayyorligini ko‘rsatadi», — deya qo‘shimcha qildi Germaniya vazirlar mahkamasi rahbari vazifasini bajaruvchi. Uning so‘zlariga ko‘ra, Rossiya Ukrainaga qarshi agressiv urushini shafqatsizlarcha davom ettirmoqda.