Hindiston Kashmirda sayyohlarga uyushtirilgan hujumdan keyin pokistonliklar vizasini bekor qildi

Hindiston Tashqi ishlar vazirligi Pokiston fuqarolaridan 27 aprelga qadar mamlakatni tark etishlarini talab qildi. Uch kun ichida pokistonliklarga berilgan barcha vizalar bekor qilinadi.

Qayd etilishicha, Hindiston tomonidan Pokiston fuqarolariga berilgan amaldagi barcha vizalar 27 apreldan boshlab bekor qilinadi. Tibbiyot vizalari 29 aprelga qadar amalda bo‘ladi. Hindistonda bo‘lib turgan Pokiston fuqarolari viza muddati tugagunga qadar mamlakatni tark etishlari kerak.

Pokiston bunga javoban Hindiston bilan barcha savdolarni to‘xtatib qo‘ydi va «Hindiston tomonidan foydalaniladigan yoki unga tegishli» barcha aviakompaniyalar uchun havo makonini yopdi. Islomobod, shuningdek, Hindiston fuqarolariga Pokistonni tark etishni buyurdi va o‘z navbatida vizalardan ozod etish dasturi (SAARC) doirasida berilgan vizalarning amal qilish muddati to‘xtatilganini e’lon qildi.

Bundan tashqari, Pokiston Islomoboddagi mudofaa, harbiy-dengiz kuchlari va aviatsiya masalalari bo‘yicha hindistonlik maslahatchilarni «persona non grata» deb e’lon qildi.

22 aprel kuni Kashmirning Hindistondagi qismida qurollangan shaxslar sayyohlar guruhini o‘qqa tutishi oqibatida 26 kishi halok bo‘ldi, 17 kishi yaralandi. Hodisa Paxalgam shahri yaqinida — mamlakatning eng mashhur sayyohlik nuqtalaridan birida yuz berdi.

Hind kuch tuzilmalarining taxminicha, hujumni olti nafar jangari uyushtirgan. Ular Baysaran vodiysidagi so‘qmoq bo‘ylab harakatlanayotgan sayyohlarga o‘t ochgan. Hujum uchun mas’uliyatni «Kashmir qarshiligi» qurolli guruhi o‘z zimmasiga olgan. Hindiston hujumni Pokiston bilan bog‘lamoqda. Bosh vazir Narendra Modi hujumni terakt deb atadi va aybdorlar «javobgarlikka tortilishini» ma’lum qildi. Pokiston hukumati hujumga aloqasi borligini rad etdi.