Tramp: G‘azoda Hamas garovga olgan yana uch kishi halok bo‘ldi

AQSh prezidenti Donald Tramp 6 may, seshanba kuni Falastinning Hamas guruhi tomonidan G‘azo sektorida garovga olingan yana uch kishi halok bo‘lganini ma’lum qildi. Oq uyda bo‘lib o‘tgan tadbirda so‘zlagan Tramp isroillik garovga olinganlar bilan yaqinda bo‘lib o‘tgan uchrashuvda tashkilot asirligida 24 kishi tirik qolgani ma’lum qilinganini eslatdi. «Bugungi kunda ularning soni 21 nafar, uch nafari halok bo‘ldi», dedi Amerika prezidenti.

«Biz imkon qadar ko‘proq garovga olinganlarni qutqarish uchun qo‘limizdan kelganini qilmoqchimiz», — deya qo‘shimcha qildi Donald Tramp va vaziyatni «dahshatli» deb atadi. Isroil armiyasining 2023 yil 7 oktyabrdagi o‘g‘irlanganlar haqidagi so‘nggi hisobotiga ko‘ra, ulardan 58 nafari hali ham G‘azo sektorida hamaschilar qo‘lida. 34 nafari vafot etgani taxmin qilinmoqda.

13-16 may kunlari Donald Tramp Saudiya Arabistoni, Qatar va Birlashgan Arab Amirliklariga tashrif buyurishni rejalashtirmoqda. Shuningdek, u 6 may kuni tashrif oldidan «juda va juda muhim e’lon» berishini aytdi, biroq tafsilotlarni keltirmadi.