BMT: G‘azoda issiq ovqat tarqatish miqdori 70 foizga kamaydi

Stefan Dyujarrik eksklavdagi yomonlashayotgan gumanitar vaziyatga e’tibor qaratdi.

Foto: Getty Images

G‘azo sektoridagi gumanitar vaziyat keskin yomonlashda davom etmoqda. Aholiga tarqatilayotgan issiq tushlik o‘tgan haftaga nisbatan 70 foizga kamaydi.

BMT matbuot kotibi Stefan Dyujarrik brifingda aytganidek, ishlayotgan oshxonalar resurslar yetishmasligi sababli oziq-ovqat tayyorlash imkonini yo‘qotmoqda.

Agar ilgari kuniga qariyb 840 ming porsiya tarqatilgan bo‘lsa, hozir bu atigi 260 mingni tashkil etadi, deya ta’kidladi tashkilot vakili va insonparvarlik yordami faqatgina oziq-ovqatdan iborat emasligini qo‘shimcha qildi. «Odamlarga suv, sanitariya, tibbiyot, ta’lim va himoya kerak», dedi Dyujarrik.

Uning so‘zlariga ko‘ra, shifoxonalar va suv ta’minoti obektlarida yonilg‘i zaxiralari kamaymoqda. «G‘azodagi tibbiyot tizimi tanazzul yoqasida. Kasalxonalar yaradorlar bilan to‘lib-toshgan, dori-darmon, asbob-uskunalar, qon va xodimlarning keskin tanqisligi kuzatilmoqda», — dedi BMT vakili.

#BMT #G‘azo #gumanitar vaziyat

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.