Ukraina Milliy xavfsizlik va mudofaa kengashi kotibining sobiq o‘rinbosari Ispaniyada ushlandi

2015 yildan 2019 yilgacha Milliy xavfsizlik va mudofaa kengashida ishlagan Oleg Gladkovskiy Ukrainada davlat buyurtmasi doirasida yuk mashinalarini oshirilgan narxlarda xarid qilganlikda gumon qilinmoqda. Hozirda uni ekstraditsiya qilish masalasi hal etilmoqda.

Foto: RFE / RL

Ispaniyada Ukraina Milliy xavfsizlik va mudofaa kengashi kotibining sobiq birinchi o‘rinbosari qo‘lga olindi. Bu haqda 14 may, chorshanba kuni Korrupsiyaga qarshi kurash bo‘yicha ixtisoslashtirilgan prokuratura va Ukraina milliy aksilkorrupsiya byurosi ma’lum qildi.

Ishga aloqador shaxsning ismi rasman oshkor etilmagan, biroq Ukraina ommaviy axborot vositalari, xususan, «Ukrainskaya pravda» va «Suspіlne» nashrlari manbalarga tayanib, gap 2015 yildan 2019 yilgacha Milliy xavfsizlik va mudofaa kengashida ishlagan Oleg Gladkovskiy (Svinarchuk) haqida ketayotganini yozmoqda.

Ukrainaning beshinchi prezidenti Pyotr Poroshenkoning asosiy biznes sheriklaridan biri deb atalgan Gladkovskiy 2024 yilning aprelidan beri qidiruvda, vatanida u davlatga 17 million grivnadan ortiq zarar yetkazganlikda ayblanmoqda. Hozirda uni Ukrainaga ekstraditsiya qilish masalasi hal etilmoqda.