YeI Rossiyaga qarshi to‘rtta rejim doirasida sanksiyalar kiritdi

20 may, seshanba kuni Bryusselda Yevropa Ittifoqi davlatlari tashqi ishlar vazirlari tomonidan Yevropa Ittifoqi tashqi ishlar kengashi yig‘ilishida Rossiyaga qarshi bir vaqtning o‘zida bir nechta sanksiya rejimlarining «tarixdagi eng yirik» qo‘llanishi ma’qullandi. Yig‘ilish ishtirokchilari Rossiya Federatsiyasiga nisbatan to‘rtta sanksiya rejimi doirasida cheklov choralarini ma’qulladilar: Ukrainaga qarshi tajovuzkor urushi, inson huquqlarini qo‘pol ravishda buzgani, G‘arb davlatlariga qarshi gibrid faoliyati va kimyoviy qurol ishlatgani uchun. Hammasi bo‘lib 130 dan ortiq individual sanksiyalar, jumladan, Rossiya harbiy-sanoat kompleksi, «soyadagi floti» va uning sheriklariga, uchinchi mamlakatlardan Rossiya uchun sanksiyalangan tovarlarni yetkazib beruvchilarga, shuningdek, tashviqot va dezinformatsiya tarqatuvchilarga nisbatan qabul qilindi.

Rossiyaning Ukrainadagi tajovuzi uchun jazolarning 17-to‘plami doirasida sanksiya ro‘yxatiga 75 ta yangi yuridik va jismoniy shaxslar, shuningdek, 189 ta «soyadagi flot» kemalari kiritildi. Bu Yevropa Ittifoqining rasmiy jurnalida chop etilgan hujjatga ko‘ra, Yevropa Ittifoqi ro‘yxatidagi shaxslar sonini 2400 dan ortiq, kemalar sonini esa 342 taga yetkazadi.

Yangi cheklovlar, xususan, «KAMAZ» bosh direktori Sergey Kogogin va «Surgutneftegaz» neft kompaniyasiga ta’sir ko‘rsatdi. Umuman olganda, ushbu hujjat birinchi navbatda qurol va harbiy texnika, jumladan, dronlarni ishlab chiqarish bilan bog‘liq bo‘lgan 17 jismoniy va 58 yuridik shaxsni o‘z ichiga oladi.

Gibrid faoliyat uchun Yevropa Ittifoqining sanksiyalar rejimi doirasida Rossiya Federatsiyasida 27 jismoniy va yuridik shaxslarga nisbatan choralar, shuningdek, individual jazo choralari joriy etildi.

Yevropa Ittifoqining inson huquqlarini buzganlik uchun global sanksiya rejimi doirasida Rossiyadan yana 28 nafar jismoniy va yuridik shaxs sanksiyalar ro‘yxatiga qo‘shildi. Ular orasida siyosiy mahbus Aleksey Gorinovga nisbatan ayblov hukmini chiqargan sudya Olesya Mendeleyeva va shu mahkamada davlat ayblovchisi sifatida ishlagan Svetlana Juravleva ham bor. Qolganlarning hammasi sudyalar, prokurorlar va tergovchilardir, shuningdek, Federal jazoni ijro etish xizmatining bir xodimi bor.

Ukrainada «kimyoviy qurolning tarqalishi va qo‘llanishi» bilan bog‘liq alohida ro‘yxat tasdiqlandi. Uning tarkibiga Rossiya Mudofaa vazirligining radiatsiya, kimyoviy va biologik mudofaa qo‘shinlari va ikkita idoraviy ilmiy-tadqiqot institutlari kirgan.