Sverdlovskda yuz bergan yong‘in tufayli 9 kishi halok bo‘ldi

Rossiyaning Sverdlovsk viloyatidagi turar joy binosida chiqqan yong‘in 9 kishining hayotiga zomin bo‘ldi.

Yong‘in Yekaterinburg shahridan 100 km masofada joylashgan Suxoy Log shahridagi Kayukov ko‘chasidagi xususiy uyda ro‘y bergan. FVV ma'lumotiga ko‘ra, yong‘in mahalliy vaqt bilan soat 00:19da boshlangan va 100 kv m maydonni qamragan.

Yong‘in hududida 21 nafar o‘t o‘chiruvchi va 4ta maxsus texnika ish olib borgan. Yong‘inni butunlay bartaraf etish uchun 2 soatdan ortiq vaqt sarflangan, soat 2:31da yong‘in manbasida olov o‘chirilgan. Hududda bo‘lgan bir kishi qutqarib qolingan, u tan jarohatlari bilan shifoxonaga yotqizilgan.

Hodisa yuzasidan Rossiya federatsiyasi Jinoyat kodeksining 109 moddasi bo‘yicha jinoiy ish ochilgan.