Asad Suriyani tiklash uchun qancha mablag‘ zarurligini aytdi

Suriya prezidenti Bashar Asad Gretsiyaning «Katimerini» gazetasiga bergan intervyusida ma'lum qildiki, urushdan keyin mamlakatni tiklash uchun 200 milliard dollardan 400 milliard dollargacha bo‘lgan mablag‘ talab etiladi.

«Yuzlab milliardlar. Kamida 200 milliard dollar. Ba'zi prognozlarga ko‘ra esa 400 milliard dollar atrofida», degan Suriya prezidenti shu haqdagi savolga javoban.

«Nima uchun summaning aniq miqdori ma'lum emasmi? Chunki, ayrim tumanlar hamon terrorchilar qo‘lida qolmoqda... Men aytganim taxminiy hisob-kitoblar», deya qo‘shimcha qilgan u.

Shu bilan bir vaqtda, ko‘plab xorijiy mamlakatlar Suriyada siyosiy barqarorlikka erishilmaguniga qadar, moliyaviy yordam ajrata olmasliklarini ma'lum qilishgan.

Suriyada harbiy-siyosiy ziddiyatlar 2011 yildan buyon davom etib kelmoqda. O‘tgan yil yozida Suriyaning asosiy hududi IShIDdan ozod etilgandi, ayni vaqtda rasmiy hukumat boshqa muxolif guruhlarga qarshi kurashni davom ettirmoqda.