«Toshkent-Tehron» xalqaro avtobus marshruti yo‘lga qo‘yilishi mumkin

Prezidentning «O‘zbekiston Respublikasida ziyorat turizmini yanada rivojlantirish va ziyoratchilar uchun qulay shart-sharoitlar yaratish chora-tadbirlari to‘g‘risida»gi farmoni loyihasi e’lon qilindi.

Farmonga ilova qilingan «Uzoq xorij va qo‘shni respublikalardan xorijiy ziyoratchi sayyohlarni qabul qilish va ularga qulay shart-sharoitlar yaratish bo‘yicha «Yo‘l xaritasi»ga muvofiq, 2021 yildan boshlab transport-logistika xizmatlarini yaxshilash va rivojlantirish choralari ko‘riladi.

Loyihaga ko‘ra, «Toshkent-Buxoro-Mashhad-Tehron» xalqaro avtobus marshrutini yo‘lga qo‘yish belgilangan. Bunda, yo‘nalishni amalga oshirish uchun Eron hukumati bilan tranzit reyslar bo‘yicha kelishuvga erishish choralari ko‘riladi.

Shuningdek, «Pegasus Airlines» aviakompaniyasiga Turkiya shaharlaridan Samarqand va Buxoroga hamda Anqaradan Toshkentga to‘g‘ridan to‘g‘ri aviaqatnovlarni amalga oshirish uchun ruxsatnoma rasmiylashtirilishi ta’minlanadi.

Ushbu tadbirlarni amalga oshirish bo‘yicha tashkiliy chora-tadbirlar kelishuv asosida 2021 yilda ishlab chiqilishi belgilangan. Ishlab chiqish va amalga oshirish uchun – DXX Davlat chegara qo‘shinlari, Transport vazirligi, «Uzbekistan Airports» AJ va Tashqi ishlar vazirliklari mas’ul etib belgilangan.