Toshkentda oshxona yonib ketdi

Yong‘inni o‘chirishga bir soatga yaqin vaqt ketdi.

Bugun, 26 iyul kuni soat 13:14da Toshkent shahar Favqulodda vaziyatlar boshqarmasiga Olmazor tumani Ahmad Donish ko‘chasida joylashgan «Zamondosh» oshxonasida yong‘in sodir bo‘layotganligi to‘g‘risida xabar kelib tushgan.

Rasmiy ma'lumotda aytilishicha, qisqa vaqt ichida Favqulodda vaziyatlar vazirligining 5ta yong‘in-qutqaruv guruhi voqea joyiga jalb etilgan. Binoning taxminan 400 kvadrat metr maydoni yong‘indan zararlangan.

Yong‘in soat 13:33da o‘rab olingan va soat 14:31da batamom o‘chirilgan. Voqea joyiga Favqulodda vaziyatlar vazirligi rahbariyati yetib borgan.

Hodisa oqibatida tan jarohati olgan va halok bo‘lganlar to‘g‘risida ma'lumot kelib tushmagani aytiladi.

#yong‘in #oshxona