Chilonzor tumanidagi ko‘p qavatli uylardan birida gaz portladi

Joriy yilning 3 oktabr kuni soat 22:13larda Toshkent shahrining Chilonzor tumani 7-kvartalida joylashgan 59-uyda, birlamchi ma'lumotga ko‘ra, gaz-havo aralashmasining chaqnashi sodir bo‘lgan.

Favqulodda vaziyatlar vazirligi xabariga ko‘ra, voqea yetti qavatli uyning 36-kvartirasida sodir bo‘lgan. Favqulodda vaziyat oqibatlarini bartaraf etish uchun Favqulodda vaziyatlar vazirligining 5ta yong‘in-qutqaruv ekipaji voqea joyiga yetib borgan.

Mavjud ma'lumotlarga ko‘ra, uy aholisi jabrlanmagan. Qurbonlar yo‘q. Vaziyat oqibatida bir nechta kvartiralarga qisman zarar yetgan, deraza va eshiklar shikastlangan.

Qayd etilishicha, ayni vaqtda ushbu favqulodda vaziyatning sabablari o‘rganilmoqda. 17 nafar uyi shikastlangan fuqarolar vaqtinchalik mehmonxonaga joylashtirilgan.