Shavkat Mirziyoyev shu yil oxirigacha Qozog‘istonga boradi

Oqo‘rda matbuot xizmati xabariga ko‘ra, davlat rahbarlarining suhbatida Qozog‘iston va O‘zbekiston o‘rtasidagi strategik sheriklikni ikki tomonlama kun tartibining barcha yo‘nalishlari bo‘yicha yanada rivojlantirish masalalari yuzasidan atroflicha fikr almashildi.

«Savdo-iqtisodiy hamkorlikni rivojlantirish, sarmoyaviy aloqalarni mustahkamlash, shuningdek, sanoat, mashinasozlik, transport-logistika, qishloq xo‘jaligi va boshqa sohalarda qo‘shma loyihalarni amalga oshirishga ustuvor ahamiyat berildi», — deyiladi xabarda. 

Shuningdek, ko‘p qirrali Qozog‘iston-O‘zbekiston munosabatlariga amaliy turtki berish maqsadida suhbatdoshlar joriy yil oxirigacha O‘zbekiston rahbari Shavkat Mirziyoyevning Qozog‘istonga davlat tashrifini tashkil etish bo‘yicha kelishuvga erishgani ma'lum bo‘ldi.

«Shu munosabat bilan ikki davlat hukumatlariga bo‘lajak muzokaralarni yuqori darajada mazmunli o‘tishini ta'minlash vazifasi topshirildi», — deya xulosa qilingan Oqo‘rda xabarida.