Turkmanistonda talabalarga ijtimoiy tarmoqlarga kirish va Green Card o‘ynash taqiqlandi

Majlisda chiqish qilgan rektor G.Muhammedov uch talaba so‘nggi vaqtlarda turkman talabasi nomini bulg‘aydigan nojo‘ya xatti-harakatlarga yo‘l qo‘yganini ma'lum qildi. Ikki nafar qiz fohishalik bilan shug‘ullangan, bir talaba esa o‘g‘rilik qilgani uchun politsiya tomonidan qo‘lga olinganini aytgan.

Prokuratura vakili xorij internet nashrlari va ijtimoiy tarmoqlarning yoshlarga salbiy ta'siridan shikoyat qildi. U talabalarga ijtimoiy tarmoqlar va VPN’dan foydalanmaslik, oliy ta'lim muassasasiga telefon olib kelmaslik, uni yotoqxona yoki uyda tashlab kelishni maslahat berdi.

Oliy ta'lim muassasasi ayollar ittifoqi bo‘limi rahbari qizlar har yarim yilda ayollar maslahatxonasida tibbiy ko‘rikdan o‘tishlari va dekanatga tibbiy ma'lumotnoma taqdim etishlarini taklif etdi.

Yig‘ilishda ko‘plab talabalar AQShning “Grin karta” (Diversity Visa Lottery) to‘ldirishayotgani borasida ham xavotirlar aytib o‘tildi.

«Sizlarni ogohlantiraman, agar orangizda mana shu kartani to‘ldirganlar yoki boshqa usullar bilan mamlakatdan ketishni istaydiganlar bo‘lsa, ular o‘qishdan haydaladi. Bu yerda vatanimiz uchun kadrlar tayyorlayapmiz», — degan rektor o‘zining yakuniy nutqida.

Avvalroq Turkmaniston davlat madaniyat instituti o‘qituvchilaridan VPN ilovalaridan foydalanmaslik, Instagram hamda Facebook’ka kirmaslik haqida tilxat yozdirib olingani ma'lum qilingan edi. Ularga videorolik va fotosuratlar yuborish uchun Turkmanistonda ishlab turgan  yagona IMO messenjeridan foydalanish taqiqlangan. Endi faqat matnli xabarlar yuborish mumkin.