Qo‘ng‘irotlik ovchilar Shumanayda 150 dona yovvoyi kabutarni ovlashdi

Qoraqalpog‘iston Respublikasi Ekologiya qo‘mitasining Shumanay tuman inspeksiyasi tomonidan "Ketenler" OFY hududida tezkor reyd tadbiri o‘tkazilgan. Unda Qo‘ng‘irot tumanida yashovchi 3 nafar fuqaro tomonidan noqonuniy ravishda 150 dona yovvoyi kabutarlar ovlanganligi aniqlangan.

Holat yuzasidan qonunbuzar fuqarolarga nisbatan tegishli hujjatlar rasmiylashtirilgan. Kabutar ovchilariga Ma'muriy javobgarlik to‘g‘risidagi kodeksning 90-moddasi 4-bandiga asosan ma'muriy ishlar bo‘yicha sud organiga o‘tkazish uchun hujjatlar tayyorlanmoqda.

Qo‘shimcha qilinishicha, noqonuniy tarzda tutilgan kabutarlar ozuqa uchun Nukus shahridagi hayvonot bog‘iga beg‘araz topshirilgan.

Oldinroq Qoraqalpog‘istondagi yagona hayvonot bog‘i yopilib ketish arafasida qolgani haqida xabar bergandik. O‘shanda Nukusdagi xususiy hayvonot bog‘ida ayiq suvsiz qoldirilib, tahqirlangani aytilgandi.