Urganchda alohida yo‘lakda harakatlanuvchi tezyurar avtobuslar yo‘lga qo‘yiladi

Urganch shahrining transport tizimini rivojlantirish modelini ishlab chiqish va shaharda BRT tizimini yaratish uchun 1,211 milliard so‘m mablag‘ ajratiladi. Xorazm viloyati hokimi bu boradagi tegishli farmoyishni imzolagan.

BRT (Bus rapid transit– tezkor avtobus transporti yoki metrobus) an’anaviy avtobus marshrutlariga qaraganda tezkorlik, ishonchlilik va yo‘lovchi tashish imkoniyatlari yuqoriligi bilan ajralib turadi.

Mazkur mablag‘ viloyat mahalliy budjetining 2021 yil 3-chorak daromadlar rejasini oshirib bajarilgan qismi hisobidan Urganch shahar mahalliy budjetiga ajratiladi.

Farmoyish bilan Xorazm moliya bosh boshqarmasiga viloyat mahalliy budjetiga tegishli o‘zgartirishlar kiritish, viloyat g‘aznachilik boshqarmasiga ajratilgan mablag‘larni belgilangan tartibda o‘tkazilishini ta’minlash, viloyat davlat moliyaviy-nazorat boshqarmasiga esa ajratilgan mablag‘larni maqsadli ishlatilishini nazorat qilish vazifasi yuklangan.

Metrobuslar uchun alohida yo‘lak ajratiladi, bekatlar yopiq ko‘rinishda bo‘ladi va chipta sotiladigan kassalar bilan ta’minlanadi.