5 sentabrdan Toshkent metrosida poyezdlar intervali qisqartiriladi

Toshkent metropoliteni yangi o‘quv yili boshlanishi munosabati bilan ertalabki tig‘iz vaqtlarda poyezdlarning oraliq intervali qisqartirilishini ma’lum qildi. 07:30–09:30 oralig‘ida poyezdlar “Chilonzor” yo‘nalishida 2,5–3 daqiqa, “O‘zbekiston” yo‘nalishida 3,5–4 daqiqa, “Yunusobod” yo‘nalishida esa 5-6 daqiqa interval bilan harakatlanadi.

Foto: Kun.uz

Toshkent metropolitenining kunlik yo‘lovchilari soni 2021 yilga taqqoslaganda 150-200 ming nafarga ortib, 450-480 mingni tashkil qilmoqda.

Sentyabr oyidan metro xizmatidan foydalanuvchilar soni kuniga 500 ming nafardan ortishi kutilyapti. Bu haqda bugun AOKAda metropoliten mutasaddilari ishtirokida bo‘lib o‘tgan matbuot anjumanida ma’lum qilindi.

Qayd etilishicha, ortib borayotgan yuklamani qondirish uchun Rossiyaning “Metrovagonmash” kompaniyasi ishlab chiqargan yana 14 ta yangi harakat tarkibi sotib olinadi.

5 sentabrdan yangi o‘quv yili boshlanishi munosabati bilan shu kundan boshlab ertalabki tig‘iz vaqtlarda (07:30dan 09:30gacha) poyezdlarning oraliq intervali qisqartiriladi va quyidagicha belgilanadi:

“Chilonzor” yo‘nalishida 2,5–3 daqiqa;
“O‘zbekiston” yo‘nalishida 3,5–4 daqiqa;
“Yunusobod” yo‘nalishida 5-6 daqiqa.

Eslatib o‘tamiz, 16 avgustdan 5 sentabrgacha yer usti xalqa yo‘li yo‘nalishida poyezdlar harakati texnik sabablar tufayli soat 05:00 dan 23:00 gacha amalga oshirilishi xabar qilingan.